• 2010-07-29 Sekva REK - en Ĉeboksaro

  Laŭ interkonsenta decido de Rusia E-unio (REU) kaj E-Asocio de Ĉuvaŝa Respubliko (EA ĈR) sekva Rusia Esperantista kongreso (REK), havonta numeron 27, okazos en Ĉeboksaro. Provizoraj datoj estas 20-23 de oktobro 2011, sed estas ege malverŝajne, ke la datoj ŝanĝiĝos (povos okazi nur ke REK komenciĝos je unu tago pli frue).
  
  La kongreso okazos samtempe kun fama aranĝo, kiun okazigas ĉeboksaraj esperantistoj – Lingva Festivalo (LF). Dank' al tio oni povos profiti ambaŭflanke – grandan parton de la kongresa programo okupos LF, kaj LF mem ricevos iom pli da partoprenantoj, ol kutime.
  
  Sendube dum REK ankaŭ troviĝos loko por kutimaj programeroj – prelegoj, diskutoj, ekskursa programo kaj konferenco de REU. La koncerta parto estos unuigita kun tiu de LF.
  
  Konsisto de organiza komitato ankoraŭ ne estis difinita, sed tien eniros ĉefaj funkciuloj de REU kaj EAĈR.
  
  Sekvu la novaĵojn kaj estu kune kun REU!

• 2010-07-28 Deĵortempo en la oficejo de REU en julio-aŭgusto

  Dum julio-aŭgusto deĵorhoroj en la moskva oficejo de REU  estas 19:30 - 21:00 en ĉiu merkredo kaj vendredo. Tamen dezirindas averti pri probabla vizito anticipe laŭ telefono (916)2019437.

  La adreso estas Grafskij per.,12-A, str. 2, of. 108. Mape vidu www.reu.ru/bildoj/Grafskij-MAPO.jpg

• 2010-07-02 Starto de la retejo e-kluboj.ru

  Unu el plej gravaj programeroj de REU-estraro por la sekva jaro estas kreo de la retejo www.e-kluboj.ru. Ĝi celas unuigi informojn pri ĉiuj E-kluboj, E-kolektivoj kaj unuopuloj, kiuj loĝas dise en Rusio - en nia granda amata lando. La fina celo estas ke esperantistoj el diversaj rusiaj urboj pere de interreto povu facile informiĝi pri stato de E-vivo en alia urbo aŭ parto de la lando. Krome la retejo povas helpi interkomunikadon de esperantistoj el diversaj urboj kaj eventualajn reciprokajn vizitojn de esperantistoj. Ideale sed sengarantie - ni havos pli-malpli plenan superrigardon pri fakta stato de E-movado en Rusio.
  
  La retejo jam funkcias - oni povas viziti kaj rigardi. Sed laboro pri ĝi ankoraŭ ne finiĝis, eĉ inverse - plej grava parto nur komenciĝas. La retejo el teknika vidpunkto pretas, sed necesas ĝin plenigi per informoj. E-kluboj.ru estas farita surbaze de la viki-teknologio, kio faciligas redaktadon de informoj.
  

  Praktikaj demandoj kiuj nun aperas estas jenaj.

  Ĉu la listo de la urboj estas kompleta kaj ĝusta? Evidente ne - do bonvolu sendi korektojn - kiuj urboj estas forgesita kaj superfluaj do forstrekendaj.

  Se vi pretas redakti la informojn pri via urbo - ekzemple rigardu preskaŭ pretan paĝon pri Kostroma (http://e-kluboj.ru/Kostroma)
  
  Se vi volas rakonti pri via urbo, sed vin "timigas" Vikipedio, skribu al mi kaj ni iel solvos la problemeton.
  
  Alilandaj urboj ne estas en la listo por ne provoki skandalojn, ĉar temas pri aktivaĵo de REU kaj la retejo estas en la zono .ru. Sed sendube estos tre bone, se decidos aliĝi ankaŭ niaj amikoj el Ukrainio, Belorusio kaj aliaj landoj.

  La enhava kunordiganto de la retejo estas prezidanto de REU (G.Arosev), do oni petas ĉiujn kiuj havas demandojn, korektojn, proponojn ktp skribi al li (retadreso arosev[ĉe]gmail.com).

• 2010-06-22 Vladimir Samodaj - dumviva membro de REU!

  Hieraŭ en moskva E-klubo "Lev Tolstoj" okazis celebrado de la 75-jariĝo de Vladimir Samodaj - unu el plej elstaraj personecoj kaj esperantistoj de nia lando.

  La estraro de REU aliĝis al ĉiuj gratuloj kaj proponis al V.Samodaj modestan donacon - dumvivan membrecon en nia unio, kio estis favore akceptita.

  Ni deziras al Vladimir Vladimiroviĉ longajn jarojn kaj fortegan sanon!

• 2010-06-09 Laborplano por sekva jaro

  Taskoj de REU-estaro, komisiitoj kaj helpantoj  por la kuranta mandatperiodo 

  
   
  Movada (asocia) administrado
   
  - eldoni Jarlibron (2010/2011)
  - regule kompili kaj dissendi Bultenon de REU al membroj kiuj ne ricevas REGon
  - enkonduki novajn membrokategoriojn (min. 2)
  - prizorgi refaradon de reu.ru
  - difini lokon de sekva REK aŭ REU-konferenco
   
  Novaj iniciatoj 
   
  - establo de la informservo "REU info"
  - lanĉi retejon E-kluboj.ru
  - prepari PDF-arkivon de REGo
  - krei REU-"klubojn" en la sociaj retejoj "Vkontakte" kaj "Facebook" por faciligi novaĵ-aliron kaj kontaktojn kun REU por rusiaj esperantistoj
  - subteni el teknika vidpunkto retan version de vortaro de Boris Kondratjev
   
  Kontaktoj kaj diskutoj
   
  - kontaktoj kun alilandaj naciaj E-organizoj cele establi laborajn rilatoj kun eventuala spertinterŝanĝo
  - kontaktoj kun eksaktivaj esperantistoj el la antaŭaj "generacioj" cele vigligi ilin kaj eventuale inviti al kunlaboro
  - amasa pridemandado pri okazigo de UK en Rusio kaj posta diskuto
  - amasa pridemandado pri vortaro de B.Kondratjev
  - diskuti novan koncepton de la Libroservo
  - diskuti statuson de REK
  
  Financa-administra flanko
   
  - akcepti membriĝojn, enkasigi monon
  - fine de la jaro prepari financan raporton
  - difini sorton de la oficejo
  - prizorgi bankan konton
  - dungi portempan libroteniston por prepari bilancon por banko
  - konsideri vojojn por mon-akirado (subvenci-petoj ktp)
  

Aktualaj informoj de REU.RU    Ĉiuj informoj de REU.RU